தகவல்களை மின்-அஞ்சலில் பெற !
karaikal ammaiyaar Karaikal lady of angel church karaikal kailasanathaar veethi ula karaikal mosque Title of image Title of image

26-11-2017 அடுத்து வரக்கூடிய வாரத்தில் தமிழகம் மற்றும் புதுச்சேரியில் வானிலை எப்படி இருக்கலாம் ?

26-11-2017 அடுத்து வரக்கூடிய வாரத்தில் தமிழகம் மற்றும் புதுச்சேரியில் வானிலை எப்படி இருக்கலாம் என்பதை பார்ப்பதற்கு முன் கடந்த 23-11-2017 அன்று இந்திய வானிலை ஆய்வு மையம் வெளியிட்டுள்ள அறிக்கையில் குறிப்பிட்டு இருக்கும் பெரிய அளவிலான அம்சங்கள் (Large Scale Features) குறித்து பார்ப்போம்.

  • தற்பொழுது லா-நினாவுக்கான (la-nina) சூழல்கள் நிலவி வருகிறது அடுத்த இரண்டு வாரங்களுக்கும் இதே நிலையே தொடரலாம்.
  • தற்பொழுது மேடன் ஜூலியன் அலைவு  (Madden - Julian oscillation) ஆனது அதன் 6 வது  கட்டத்தில் வீச்சு 1 என்கிற அளவுடன் உள்ளது இது வரக்கூடிய நாட்களில் வீச்சின் அளவு குறைந்த நிலையில் அதனுடைய 5 ஆம் கட்டத்துக்கு வரலாம் என எதிர்பார்க்கப்படுகிறது.
  • இந்திய பெருங்கடலின் இருமுனை (Indian Ocean Dipole ) ஆனது தற்பொழுது நடுநிலையான கட்டத்தில் உள்ளது.
லா நினாவுக்கான சூழல் என்பது தென் அமெரிக்காவுக்கு அருகே இருக்கும் பசிபிக் கடல் பரப்பின் வெப்பநிலை குறைவை குறிக்கிறது.இந்த சூழலில் வர்த்தக காற்று (Trade Wind ) என்று சொல்லக்கூடிய மேற்கு திசையில் பயணிக்க கூடிய காற்றின் வேகம் அதிகமாக இருக்கும் அவை பசிபிக் பெருங்கடலின் மறுமுனையில் அதாவது ஆசிய கண்டத்துக்கு அருகே இருக்கும் வெப்பமான பகுதிக்கு சென்று மேலே எழும்புகையில் அந்த பகுதியில் மழை மேகங்கள் அதிகமான அளவில் உருவாகுகின்றன இதன் தாக்கத்தால்   இந்தோனேஷியா ,இந்தியா உட்பட பல நாடுகளில் மழையின் அளவு அதிகரிக்கிறது.லா-நினாவின் காரணமாக சில இடங்கள் பெரிய அளவிலான பாதிப்புகள் ஏற்படவும் வாய்ப்புகள் உள்ளது ஆனால் அவை எந்த ஒரு இடத்தில் அதிக தாக்கத்தை ஏற்படுத்தும் என்பதை உறுதியாக குறிப்பிட்டு இப்பொழுதே சொல்ல முடியாது. பொதுவாக லா-நினாவின் காரணமாக இந்தியா ,இந்தோனேசியா அருகே உள்ள கடல் பகுதிகளில் மழையின் அளவு அதிகரிக்க வாய்ப்புகள் உள்ளது ஆனால் மழை அதிகரிப்புக்கு இது மட்டுமே போதாது லா-நினோவுக்கான சூழல்கள் நிலவி வந்த பொழுதே  பருவமழை பலன் வழங்காமல் போன நிகழ்வுகளும் வரலாற்றில் உண்டு.

மேடன் ஜூலியன் அலைவு  (Madden - Julian oscillation)  ஆனது இந்த மாத இறுதியில் தனது 4 வது கட்டத்துக்கு வர வாய்ப்புகள் உள்ளதாக தெரிகிறது பின்னர் அது மீண்டும் 5,6 மற்றும் 7 வது  கட்டங்களுக்கு அடுத்தடுத்து பயணிக்க வாய்ப்பு இருப்பதாக ஒரு கணிப்பியல் மாதிரி தெரிவிக்கிறது இன்னொரு  சர்வதேச கணிப்பியல் மாதிரியின் கூற்று படி நவம்பர் மாத இறுதியில் அது 8 வது கட்டத்துக்கும் டிசம்பர் முதல் வார இறுதியில் அது 2 வது மற்றும் 3 வது கட்டத்துக்கும் அடுத்தடுத்து நகர வாய்ப்புகள்  உள்ளதாக  தெரிவிக்கிறது.மேலே கூறி இருந்தது  போன்று அது நவம்பர் மாத இறுதியில் 4 வது கட்டத்துக்கு வந்தால் இந்தோனேசியா மற்றும் இந்திய பெருங்கடலில் மழையின் அளவு அதிகரிக்கும் அதனால் வங்கக்கடல் பகுதிக்கும் பயன் உண்டு.மேடன் ஜூலியன் அலைவு அதன் 3 வது கட்டத்துக்கு வராமல் இந்த மாத இறுதியிலும் டிசம்பர் முதல் வாரத்திலும் தமிழகத்தின் மழை அளவில் நேரடியான தாக்கத்தை ஏற்படுத்துமா என்பது சந்தேகம் தான் பொறுத்திருந்து  பார்ப்போம்.

26-11-2017 தற்பொழுது வங்கக்கடல் பகுதியில் இலங்கைக்கு அருகே நிலைகொண்டு இருக்கும் அந்த குறைந்த காற்றழுத்த தாழ்வு பகுதியானது மேற்கு நோக்கி நகர வாய்ப்பு இருப்பதாக தெரிகிறது ஆனால் அதன் நகர்வுகள் வேகமானதாக இல்லை நேற்று இருந்த நிலைக்கு அது இந்நேரம் இலங்கைக்கு மேற்கே நிலைகொண்டு இருக்க வேண்டும் ஆனால் அப்படி நடக்கவில்லை ஆக இனி வரக்கூடிய சில  நாட்களுக்கு தமிழகத்தில் பதிவாக இருக்கும் மழை அளவை நிர்ணயிக்க போவது அந்த குறைந்த காற்றழுத்த தாழ்வு பகுதியின் நகர்வுகள் தான்.

இனி நான் தெரிவிக்கப்போகும் தகவல்கள் அனைத்தும் அந்த குறைந்த காற்றழுத்த தாழ்வு பகுதியின் நகர்வுகளை பொறுத்து மாற்றங்களுக்கு உட்பட்டது இதன் மாற்றங்களுக்கு ஏற்ப அவ்வப்பொழுது பதிவிடுகிறேன்.

26-11-2017 தற்போழுது இலங்கைக்கு அருகே நிலைகொண்டு இருக்கும் அந்த காற்றழுத்த காற்றழுத்த தாழ்வு பகுதியானது இன்று இரவு அல்லது நாளைக்குள் இலங்கையை கடந்து இலங்கைக்கு மேற்கே குமரிக்கடலில் நிலைகொள்ள வாய்ப்புகள் உள்ளது அவ்வாறு அது மேற்கு நோக்கி நகர முற்படும்பொழுது நான் முன்பே கூறியிருந்தது போல தமிழக வட கடலோர மாவட்டங்களில் 27-11-2017 ,28-11-2017 மற்றும் 29-11-2017 ஆம் தேதிகளில் அவ்வப்பொழுது நல்ல மழைக்கு வாய்ப்பு உண்டு நெல்லை ,கன்னியாகுமரி  மற்றும் தூத்துக்குடி உள்ளிட்ட தென் மாவட்டங்களிலும் ஆங்காங்கே மழையின் அளவு அதிகரிக்க வாய்ப்புகள் உள்ளது.கடந்த காலத்தில் அந்த காற்றழுத்த தாழ்வு பகுதியின் மையப்பகுதி அவ்வப்பொழுது விரிவடைந்து காணப்பட்டது இதில் நான் எதிர்பார்ப்பது என்னவென்றால் அது குமரிக்கடலுக்கு அருகே நிலை கொண்டு இருக்கும் பொழுது  அதனுடைய மையப்பகுதி விரிவடைய வாய்ப்புகள் உள்ளது  அப்படி அது  நடக்கும் பட்சத்தில்  உள் மாவட்டங்களிலும் மிதமான மழைக்கு வாய்ப்புகள்  உருவாகும் அதாவது 27-11-2017 மற்றும் 28-11-2017 ஆம் தேதிகளில் அதே சமயம் அது மேற்கு நோக்கி குமரிக்கடலை கடந்து செல்கையில் தமிழகத்தின் மேற்கு மாவட்டங்களிலும் மழைக்கு வாய்ப்புகள்  உருவாகும் அதாவது 28-11-2017 மற்றும்  30-11-2017 ஆம் தேதிகளில் அந்த குறைந்த காற்றழுத்த தாழ்வு பகுதியின் நகர்வுகள் குறித்த ஒரு தெளிவான தகவல்கள் தெரியாத வரையில் இவை அனைத்தும் வெறும் வாய்ப்புகளே அதாவது எந்த நேரத்திலும் மாற்றங்களுக்கு உட்பட்டது.

டிசம்பர் முதல் வாரத்தில் தமிழகத்தில் மழை அளவு அதிகரிக்க வாய்ப்புகள் உள்ளதாக வானிலை ஆய்வு மையம் தெரிவித்துள்ளது ஒரு காற்றழுத்த தாழ்வு நிலை உருவாகி அது வலு பெற்று ஒரு காற்றழுத்த தாழ்வு மண்டலமாக உருவாக வாய்ப்பு இருப்பதாக தெரிகிறது ஆனால் நான் இதற்கு முன்பே பல பதிவுகளில் இருந்து தொடர்ந்து தெரிவித்து வருவது போல அவை வலு குறைந்த நிலையில் தமிழகத்தையோ அல்லது இலங்கையையோ நெருங்கிய  பின்பு வலுவடைய வேண்டும் அப்போழுது தான் அதனால் தமிழகம் பலனடைய அதிக வாய்ப்புகள் உள்ளது அதை விடுத்து தென் மேற்கு வங்கக்கடல் பகுதியை அடைவதற்கு முன்னரே அது  ஒரு காற்றழுத்த தாழ்வு மண்டலமாகவோ ,புயலாகவோ வலு அடையும் பட்சத்தில் அது வட - வட மேற்கு திசையில் நகர்ந்து தமிழகத்தை விட்டு விலகி செல்லவே அதிக வாய்ப்புகள் உருவாகும் அது குறித்த எந்த ஒரு தகவலையும் இப்பொழுதே உறுதிபட தெரிவிக்க இயலாது சிறிது காலம் பொறுத்து இது தொடர்பான தகவல்களை பதிவிடுகிறேன்.

நான் மேலே கூறி இருந்த தகவல்கள் அனைத்தும் தற்பொழுது நிலவும் வானிலையையும் அந்த குறைந்த காற்றழுத்த தாழ்வு பகுதியின் தற்பொழுதைய நகர்வுகளையும் உள்ளடக்கிய ஒரு கணிப்பு தான் இதில் மாற்றங்கள் ஏற்படும் பட்சத்தில் மீண்டும் பதிவிடுகிறேன்.


பகிர்ந்து மகிழுங்கள்
சமூக →
தொடர →
பகிர →

0 comments:

கருத்துரையிடுக

ஆங்கில உள்ளீடுகளை தமிழில் மாற்ற கீழே உள்ள பெட்டியை பயன்படுத்தவும்

Related Posts Plugin for WordPress, Blogger...